Formulario de búsqueda

Levitikus 7

Pi maligach nib mthang malfith

1Ba’aray e gafal u murung’agen e maligach ni fen e mthang malfith, pi maligach ney e rib tabgul. 2Gin ni yima li’ nge yim’ e gamanman ni maligach ni mo’oruf riy e ku aram e gin ku yira li’ nge yim’ fare gamanman ni maligach ko mthang malfith riy u ba’ ni lel’och fare altar. Ma racha’ riy e ngan pag nga downgin fa aningeg i tabthung ko fare altar. 3Ma urngin e mam riy ni yira luf ngan pi ni maligach u daken e altar: mam u p’ebuk, nge mam nib ing gil’iggan, 4nge fa gali bu’oy nge mam riy, nge gin th’abi manigil ko ad riy. 5Me urfiy e prist e pi mam ney ni gubin u daken fare altar ni ba ggan ni maligach ngak SOMOL. Ni aram e ba maligach nib mathang malfith. 6Re maligach ney ni nge fal’eg urngin ban’en nge manigil e rib tabgul. Kemus ni reb e prist e rayag ni kay boch, ni yira kay ko gin nib tabgul.

7Bay ta’reb e gafal ni ir e ngan fana’ ko fa gal maligach ni aram e maligach ko denen nge maligach ko mthang malfith: ufin fare gamanman e ba milfan ngak fare prist ni pi’ fare maligach u daken e altar. 8Ma keru’ fare gamanman npi’ nib maligach ni mo’oruf e ba milfan ngak fare prist ni pi’ fare maligach u daken e altar. 9Ma gubin e pi maligach ni grain ni kan lith u lane stof ara kan lith u lan barba’ i ban’en, fa griddle e go’ ba milfan ngak fare prist ni pi’ fare maligach ngak Got. 10Machane gubin e pi maligach ni grain, ni demturug ko kan athkuy e gapgep ni olive ngay fa ba mlik, ma gubin nib milfan ngak fapi prist ko tabnaw rok Aron ni yira f’oth rorad ni ta’reb rogon.

Maligach nma gapaseg thilin Got nge girdi’

11Tin ba’aray e bogi gafal ni murung’agen e pi maligach ni yima pi’ ngak SOMOL ni nge gapaseg thilin Got nge girdi’. 12Fa’anra pi’ be’ ba maligach ni fen e ogmagaer ngak Got, ma thingar ki chagiy ngay reb e gamanman ni maligach, nge ba flowa ni dariy e is riy: ni demturug ko lof nib dib’ag nni ngongliy ko flour ni kan athkuy e gapgep ni olive ngay ara kek nib gilgith ni kan achay e gapgep ni olive ngay ara kek nni ngongliy ko flour ni kan athkuy ko gapgep ni olive. 13Ma ku ra chagiy ko re maligach ney boch e flowa ni lof ni bay e is riy. 14Ra bmit fapi flowa min pi’ bang riy nib f’oth nib mal’eag ngak SOMOL; ni aram e ba milfan ngak fare prist ni pag e racha’ ko fare gamanman nga downgin fare altar. 15Ma thingar ni kay ufin fare gamanman ni ka rofen nni pi’ ni maligach; dariy bang riy ni yira tay ngki mun nga reb e rran.

16Fa’anra fek be’ i yib ba maligach ni nge gapas thilin Got nge girdi’ ni micheg nra rin’ fa ba maligach ni ir rok e leam rok ni nge pi’, ma de m’ay ni gubin ko rofen nni pi’ riy, ma tin ke aw riy e ngan kay ko bin migid e rran. 17Machane ra ke aw boch ko fapi ufin ni maligach ma dabisiy ni ngan urfiy ko bin dalip e rran. 18Fa’anra gaman e dalip fen ngay mu kun kay bang e ufin ko fare maligach, ma dabi fel’ u wan Got fare maligach rok facha’. Ma fare maligach e dab ni thang ko malfith rok, ya ba ta’ay, ma cha’ ni kay bang riy e ra gafgow u wenigan. 19Fa’anra math ufin fare maligach nga ban’en nib alit, ma thingar dab ni kay, ya ngan urfiy nge m’ay u mit e nifiy.

Aromed nib tabgul ni bod rogon ko yalen e rayag ni nge kay fare ufin, 20machane fa’anra be’ nib ta’ay e ke kay bang riy, ma yira n’ag facha’ ndabki mang reb e girdi’ rok Got. 21Ma fa’anra math be’ nga ban’en nib ta’ay u mit Got ndemturug ko ban’en rok e girdi’ fa gamanman, me kay ufin fare maligach, ma yira n’ag facha’ ndabki mang reb e girdi’ rok Got. 22I SOMOL e pi’ e pi gafal ni ba’aray ngak Moses 23ni fan ngak yu Israel. Dab ra ked e mam ko garbaw fa saf ara kaming. 24Mam rok ba gamanman ni yim’ ara reb e gamanman ni malboch e li’ nge yim’ e yug rayag ni ngan fanay nga boch ban’en, machane ri dab ni kay ufin. 25Yug en ra kay e mam u ba gamanman ni kan pi’ nib maligach ni mo’oruf ngak SOMOL e yira n’ag ndabki mang reb e girdi’ rok Got. 26Demturug e gin’en nra yan piyu Israel ra pired ngay, ma thingar dab ra ked e racha’ rok bmit arche’ nge gamanman. 27En nra kay e racha’ e yira n’ag ndabki mang reb e girdi’ rok Got.

28Miki pi’ SOMOL e pi gafal ni ba’aray ngak Moses 29ni fan ngak e girdi’ nu Israel. Nap’an nra pi’ be’ ba maligach nma gapaseg thilin Got nge girdi’, ma thangri fek i yib bang riy nib mal’eag ni tow’ath rok SOMOL, 30ni nge fek nga pa’ i yib ni bod ba ggan ni maligach. Ni aram e mam ko fare gamanman nge ufin u daken ngorngoren nge pi’ ngak SOMOL ni bod ba tow’ath ni bfel’. 31Fare prist e nge urfiy fapi mam u daken e altar, machane fare gi ufin u daken ngorngoren e bmilfan ngak fapi prist. 32Ma ba’ ni mat’aw i ay fare gamanman ni gin nib migid ngalang e thingar ni mel’eg ni nge mang ba f’oth 33ngak fare prist ni ir e pi’ e racha’ nge mam ni fare maligach nma gapaseg thilin Got nge girdi’. 34Ufin u daken ngorngoren fare gamanman e ba tow’ath ni bfel’, ma gin nib migid ngalang u ba’ ni mat’aw i ay e ba f’oth nib mal’eag nma fek Got rok piyu Israel nge pi ko fapi prist. Irera’ e n’en nthingar i pi’ yu Israel ngak e fapi prist e chiney i yan ngaram. 35Irera’ e gin’en ko fare ggan ni yima pi’ ngak SOMOL ni ir e ni pi’ ngak Aron nge fapi pumo’on ni fak ko rofen nni yiblayrad ni ngar manged prist. 36Rofen n’em e motochiyel SOMOL ngak yu Israel ni ngar pi’ed ngak fapi prist e giney ko fare maligach. Nib motochiyel ni ngi i fol e girdi’ nu Israel riy e chiney i yan ngaram.

37Ere ba’aray e motochiyel ni fan ko pi maligach ni mo’oruf, nge pi maligach ni grain, nge pi maligach ni fan ko denen, nge pi maligach nib mthang malfith, nge pi maligach ni yibe yibley be’, nge pi maligach nma gapaseg thilin Got nge girdi’. 38I pi’ SOMOL e pi motochiyel ney ngak Moses u daken fare Burey ni Sinai u rom u daken e ted ni desert ko fare rran ni yog Moses ngak e girdi’ nu Israel ni ngar pi’ed e pi maligach rorad.

Bible Ni Thothup

© 2007 Bible Society of Micronesia. Released under the Creative Commons CC-BY-SA license 4.0.

More Info | Version Index