Formulario de búsqueda

2 Samuel 1

Israelitaarãpa David rey bɨdapꞌedaa Saúl pari

(1 Crónicas 10.1-12)

1Saúl piuda tꞌẽepai, David amalecitaarã pꞌoyaapꞌeda, Siclag pꞌuurudee cheji. Mama kꞌãima omé beeji. 2Kꞌãima õpeede eperã aba Siclagde pacheji Saúl soldaorãpa ãchi carpa eebai jira bɨdapꞌedaamãiipa. Chi pꞌaru jẽ baji mãikꞌaapa porode yooro pꞌora iru baji akꞌɨpiitꞌee ichi tꞌãri pꞌua bɨ. David kꞌĩrapite pakꞌãri, bedabaidachi tau bɨɨrɨ eujãde tꞌõbairumaa.

3Mãpai Davidpa iidiji:

—¿Pɨ sãmãikꞌaapa cheruma? aji.

Ma eperãpa pꞌanauji:

—Israeldepema soldaorã carpa eebai jira bɨdapꞌedaamãiipa cheru. Mɨ aupai chokꞌai uchiajida aji.

4Mãpai Davidpa iidiji:

—¿Sãgajima? ¡Jarapáde! aji.

Ma eperãpa pꞌanauji:

—Chõo pꞌanadapꞌedaadeepa Israeldepema soldaorã jĩchoo wãjidada aji. Cho–kꞌara piujida, Saúl chi warra Jonatán paara.

5Mãpai Davidpa iidiji ma kꞌũtrãa jara chedamaa:

—¿Sãga kꞌawa bɨma aji, Saúl mãikꞌaapa chi warra Jonatán piudapꞌedaa?

6Mãgɨpa pꞌanauji:

—Pariatua mɨ baji Guilboa eede chõo para bakꞌãri. Mãga jõnɨde Saúl unuji baairu ichi miasu ɨ̃rɨ. Waide piu–e baji, filisteorã carreta caballopa jidiupata irumaa chewã nipadakꞌãri. 7Mãga nɨde irua ãpɨtee akꞌɨji mãikꞌaapa mɨ unuji. Mãpai mɨ tꞌɨ̃ji. Mapa mɨa irumaa jaraji: “Pɨa jara bɨkꞌa mɨa ooitꞌeeda” aji.

8’Mãpai irua mɨmaa iidiji: “¿Pɨ kꞌaima?” aji.

’Mɨa pꞌanauji: “Mɨ amalecitada” aji. 9’Mãpai irua mɨmaa jaraji: “Mɨ kꞌaitꞌaara chéji mãikꞌaapa aweda peetꞌáaji mɨ piu wã perã.”

10’Mapa mɨ iru kꞌaitꞌaara wãpꞌeda, iru peetꞌaaji. Mɨa kꞌawa baji iru pꞌoyaa chokꞌai bee–e pai, mãgá su bada perã. Maapꞌeda mɨchi waibɨa, mɨa chi poro jɨ̃ra mãikꞌaapa jua manilla ataji aneeitꞌee pɨmaa.

11Ma pedee ũridakꞌãri, Davidpa arii pꞌanadapꞌedaarã ome ãchi pꞌaru jẽtꞌaajida akꞌɨpidaitꞌee tꞌãri pꞌua pꞌanɨ. 12Mãpai tꞌãri pꞌuapa jẽe para beeji Saul–itꞌee mãikꞌaapa chi warra Jonatan–itꞌee. Ichiaba jẽejida Tachi Akꞌõre pꞌuuru pidaarã–itꞌee, ma israelitaarã soldaorã chõo atuadapꞌedaa perã mãikꞌaapa chokꞌara piudapꞌedaa perã. Mãga pꞌaneejida, nekꞌoda–ee, kꞌewara parumaa.

13Maapꞌeda Davidpa iidiji ma kꞌũtrãa, chi jara chedamaa:

—¿Pɨ sãpemama? aji.

Irua pꞌanauji:

—Mɨ amalecita; awaraa eujãdepema mĩda, na eujãde baparida aji.

14Mãpai Davidpa mãgaji:

—¿Sãapꞌeda pɨ waawee–e bajima aji, Tachi Akꞌõrepa jɨrɨtꞌerada peeitꞌee?

15Mãpai Davidpa soldao aba tꞌɨ̃ atapꞌeda, irumaa mãgaji:

—¡Iru peetꞌaapáde! aji.

Mãgá ma amalecita peetꞌaaji.

16Ma amalecita mãgá piu wãde, Davidpa mãgaji:

—Pɨa jarada kꞌaurepa piuruda aji, pɨchi itꞌaipa jarada perã pɨa Tachi Akꞌõrepa jɨrɨtꞌerada peeda.

Davidpa kꞌĩsia paraa kꞌari pꞌãda Saúl mãikꞌaapa Jonatán kꞌirãpadamerã

17Ma tꞌẽepai Davidpa na kꞌĩsia paraa kꞌari pꞌãji, israelitaarãpa Saúl mãikꞌaapa chi warra Jonatán kꞌirãpadamerã. 18Na kꞌari tꞌɨ̃ bɨji Ematrɨma Kꞌari. Jaraji na kꞌari Judá eujãdepemaarãmaa jarateedamerã. Na kꞌari pꞌã bɨji libro Jaser apatade.

19‘‘Israel eujãde ee jẽra bɨmãi tachi poro waibɨarã piujida. ¡Taarã–eweda sõcharra beerã piujida! 20Israelitaarã, ma piudapꞌedaa Gat pꞌuurude wa Ascalón pꞌuuru calle jãde jaranáatɨ Filisteadepema wẽraarã o–ĩa pꞌananaadamerã; ma ijãadakꞌaa beerã o–ĩapa pëiranaadamerã. 21¡Guilboa eujãde eera jẽra bɨmãi kꞌoi cheikꞌaraa bɨ mãikꞌaapa sereno baaiikꞌaraa bɨ; ma awara waa trigo chauikꞌaraa bɨ Tachi Akꞌõremaa teenadamerã! ¡Mãga pꞌasaikꞌaraa bɨ mama eperãarã chokꞌara piudapꞌedaa perã! Mama sõcharra beerã escudo ɨ̃rɨ tꞌɨajida. Saúl escudo aceitepa pꞌuruda waapa tꞌãu beeji. 22Naaweda Saúl chi warra Jonatán ome ichita ãpɨtee chepachida, chõo pꞌanadapꞌeda mãikꞌaapa chõo kꞌawaa beerã peedapꞌeda. Mãgá chedakꞌãri, ãchi espada, sia paara tꞌãu pꞌanajida ma chõo kꞌawaa beerã traapa mãikꞌaapa waapa. 23Israelitaarãpa Saúl mãikꞌaapa Jonatán kꞌinia iru pꞌanapachida, tꞌãri pia pꞌanadapꞌedaa perã. Aukꞌa chõonapachida. Mãgá aukꞌa piujida. ¡Chõo jõnɨde nejɨ̃pɨ kꞌapꞌipꞌia wãabaipari kꞌãyaara kꞌapꞌipꞌiara pꞌirapachida mãikꞌaapa león juataura bapari kꞌãyaara juataura pꞌanajida!

24”¡Israeldepema wẽraarã, Saul–itꞌee jẽ́etɨ! Iru kꞌaurepa parãpa nẽe mãikꞌaapa pꞌaru pi–ia jɨ̃pachida; pꞌaru pꞌoree, linodee kꞌada. 25¡Chõo jõnɨde tachi sõcharra beerã baaijida! ¡Jonatán tachi eujãdepema ee jẽra bɨde piuji! 26Jonatán, mɨ audú tꞌãri pꞌua nɨ̃bɨ pɨ piuda perã. Mɨchi ɨ̃pemakꞌa baji; chikꞌinia pꞌanapachida. Pɨa mɨ kꞌiniara iru baji wẽraarãpa ãchi ɨmɨkꞌĩra mãikꞌaapa ãchi warrarã kꞌinia iru pꞌanapata kꞌãyaara. 27¡Tachi sõcharra beerã baaijida mãikꞌaapa ãchi arma chõo pꞌanadapꞌedaamãi jõdachida!’’

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index