Formulario de búsqueda

Matiu 20

La vikarara la tilovo tegiteu la bilalaha ale igogolu te la mahuma la vaen

1“La pulolou la matagagala te La Tahalo Uru eia mai sesele la tahalo isasa, eia tahola la mahuma la vaen isa uru, te la kavikoki bisi eia hiliti goio puli isahari la valalua veia egite ge igogolu te la mahuma la vaen tetala. 2Eia goio veia giteu veia eia ge loto legiteu la mapa ale taritigi, koramuli la igogolu te la haro isasa, eia goio baha taro egiteu soio te la mahuma la vaen tetalae.

3“Goma, te la mata la haro ualasiu te la kavikoki, eia goio kavovou soio la tia la mautu, eia hilo egiteu la valalua isahari, egite pou bulalahu moli, la igogolu ouka, 4eia goio veia giteu mago ‘Amuto tai ge gorivo la mahuma taku, amuto ge igogolu, eau ge abia mutou la mapa ale koramuli amutou te la igogolu tamutoue.’ 5Tio egite loloa mai ele, egite goio tuga.

“Goio te la mata la haro savulusa gete lua te la haro, te la mata la haro tai itolu te la maulavi, eia goio kavovou lou soio la tia la mautu, eia igo loua mai ele, veia ge baha egiteu isahari soio te la igogolu, veia eia ge loto tigi tai egiteu ele. 6Goio, te la mata la haro ilima lou te la maulavi, eia goio gogala lou, eia hilo vuti lou egiteu isahari oio, egite magiri bulalahu moli, la igogolu ouka. Tio e taho la mahumale goio tahi egiteu mago ‘Amuto igo mave, la haro isa uru igoie, amuto kama igogolu bakisi, amuto pou bulalahu moli, amuto igo mave?’

7“Tio, egite koliala soio mago ‘La vuhula la tahalo isasa kama abia miteu la igogolu.’

“Goio, e taho la mahumale eia loloa mai ele, eia goio veia giteu mago ‘Ioge, amutou tai ge gorivo ge igogolu te la mahuma la vaen taku.’

8“Tio, la paga logologoti, e taho la mahuma goio tolea la tahalo ale baumuli egiteu la valalua la igogolu ele, eia veiala mago ‘Eme ge tola egiteu la valalua la igogolu, eme ge abia giteu la mapa giteu, tio mai eme ge abia giteu la mapa, eme ge sokoa tegiteu ale guvi mulimuli kililili, kara tegiteu ale egite guvi pala, egite guvi mamuga.’ 9Tio egiteu la valalua ale egite soko la igogolu te la maulavi, mai te la mata la haro ilima moli ele, egite sibitala, egite goio abi la mapa giteu, egite abi la mapa ale taritigi koramuli la igogolu mai te la haro isasa. 10Eala moli egite la valalua la igogolu ale egite guvi pala, egite soko sesele la igogolu te la kavikoki bisi, egite goio sibitala, egite gabutalea veia egite ge abi la mapa giteu eia ge uru bakisi tegiteu ale guvi mulimuli, eala moli ouka, egite abi la mapa ale visauru moli. 11Egite hilo la mapa giteu eia visauru moli me egiteu ale egite guvi mulimuli, egite igo totolotia e taho la mahumao. 12Egite goio tahia mago ‘Egiteu ale guvi moli te la maulavi, egite kama igogolu tabaa, egite igogolu moli la mata la haro isa moli, me ilava la mapa giteu visauru moli tamiteu e? Amiteu, amite soko sesele la igogolu te la kavikoki sesele, la igogolu tamiteu vagari pepeho, la haro kue vavaga amite, la maholo mite pusi.’

13“Tio, egite tahia maie, eia goio koli la tilahi tegiteu soio, eia vikara soio te la tahalo tegiteu isale, mago ‘Tabaragu, eau kama igo gegerume, ouka, etala vigia igoiti veia la mapa ge koramuli la haro isasa. 14Taritigi eme ge abi moli la mapamu mai ale etala veitia, eme ge tuga. Eau masaga molia veia ge loto tai la tahalo ale guvi mulimuli kililili la mapa ale taritigi mai tai emei ele, la mapa mulua ge visauru moli. 15Igo mave, eme soioge veia eau umala ge mulimuli la masasagala taku te la uati taku lou, ia? Ale amuto soioge maisu totolo la vuhula eau igoa mai la gilogo soio tamutou tomi, eala amuto mera kukukumu ele.’

16“Tiele, eia ge mai seseleti aleie, egiteu ale goilo mulimuli te la pulolou la matagagala te La Tahalo Uru, eia ge vauru egiteu, egite ge muga. Egiteu ale vimuga soilo vola, La Tahalo Uru ge vibisi lou egiteu, egite ge sotigu kililili.”

La itolu la vikara matagagala te Iesus te la pileleho tetala

(Mark 10:32-34; Luk 18:31-34)

17Tio, e Iesus mite me la valalua la vimari tetala, egite tatuga te la gauru veia ge goata e Ierusalem, e Iesus puli egiteu ale savulusa gete lua tetala soio veia ge vikara moli soio tegiteu sekela, egite so tatugale, eia goio veia giteu mago 18“Hiloa, etato ge goata e Ierusalem, egite la gima taku ge sugu taro e Latu La Tahalo soio tegiteu la mulugaluga tegiteu e pris, me egiteu la tahalo la mari te la merera te Moses, egite ge vimagiriau te la vigagiala, egite ge kisi la merera veia ge bili taroau, 19egite ge sugu taro eau soio tegiteu la valalua isapolo ale kama la maratatila e Iuda, egite ge tahi vileau, egite ge kumamasiau, egite ge biliau, eau ge peho, eala moli la haro itolu ge polo, eau ge mahuli rivu lou.”

E tilale Iakob me Ioanes masagea veia e Iesus ge vauru e latula ilua

(Mark 10:35-45)

20Goio, e Iesus vikara kaluvu soio tegiteu mai ele, e rutule Sebedi goio pulia e latula ilua e Iakob mira me Ioanes soio te Iesus, eia goio toto tulu te la lagule Iesus veia ge veipala la kilaka tetala soio tetala. 21Goio, e Iesus tahia mago “Eme masaga lava?”

Eia goio veiale Iesus mago “Mai mulimuli eme ge pou la pulolou la uru taume, eme ge vauru egirua e latugu iluale, isa ge pou te galemu e gata, isa ge pou te la galemu e meru.”

22Tio, eia veiale Iesus la merera tetala mai ele, e Iesus goio koli la kilaka tegiteu mago “Amuto kama rovi tigi la paga ale amuto kaka tavua. Mave, amula koramulia ge liu tai te la kap la iligiligi ale eau tai ge liu ovola, ia?”

Goio, egira kolia soio te Iesus mago “Ee, amila koramulia.”

23Tio, e Iesus goio veia girua mago “Eia sesele, amula ge liu tai te la kap la iligiligi ale eau ge liu ovola, eala moli ere ge pou te la galegu e gata, ere ge pou te la galegu e meru, la viputumulila aleie kama taku, ouka, la paga te Tete, la pulolou alele eia raragitia tegiteu ale eia hiloviti egiteu veia egite ge pou sesele ovola.”

24Goio, egiteu ale savulusa lou la valalua te Iesus ele, egite lolo vuti la kilaka tegira tau me tario, egite igo totolo egirua. 25Eala moli e Iesus goio tola vikapopo egiteu soio tetala, eia goio veia giteu mago “Amuto rovia egite la mulugaluga tegiteu la valalua la maligoma, egite vipou la valalua me hatavivile tegiteu te la viputumulila ale vagari pepeho, me egiteu la ururu tegiteu vauru sesele egiteu lou, egite vibisi lou la valalua me hatavivile tegiteu mai ele. 26Eala moli la vulovulo ale mai ele amuto kama ge tilimulia, ouka, mai isasa tamutou masagea veia eia ge la mulugaluga tamutou, taritigi eia ge suli amutou tomi mai la bilalaha ale bisi sesele tamutou tomi. 27Mai isasa masagea veia ge urua mutou, taritigi veia eia ge mai moli la bilalaha tamutou tomi. 28E Latu La Tahalo eia mai tai moli alele, eia kama sibitala veia la valalua me hatavivile ge sulia, eia guvi moli veia ge suli amutou tomi, veia ge sugu taro tai la mahulila tetala veia ge rou rivu lou la valalua me hatavivile mapaiti ale egite pou te la kilisi te Satan.”

E Iesus vimatagaga la mata kea ilua

(Mark 10:46-52; Luk 18:35-43)

29Goio, e Iesus miteu me la valalua la vimari tetala, egite hiliti taro e Ieriko, la lolo la valalua me hatavivile uru egite tilimulia. 30Tio egira taho lua la mata girua mata kea, egira pou hagagavi te la pepe la gauru, egira goio loloa veia e Iesus loio tatuga, egira goio tola agi oata mago “Tahalo Uru, emei e tubule Devit ele, taritigi eme ge gogo amilua!”

31Eala moli la valalua me hatavivile ale usu ele, egite mera taro egirua veia egira ge makovu, eala moli egira tola agi lou oata mago “Tahalo Uru, eme e tubule Devit ele, taritigi eme ge gogo amilua!”

32Tio, e Iesus lolo egirua, eia goio magiri, eia tola egirua soio tetala, eia goio tahi egirua mago “Amula masagea veia eau ge suli amulua mave?”

33Egira goio veiala mago “Tahalo Uru, amila masagea veia la mata milua ge matagaga.”

34Tio e Iesus goio gogo pepeho egirua, eia goio sau la mata girua, oio moli ovola la mata girua matagaga, egira goio tilimuli e Iesus soio.

La Buk Tabu ale halaba te la valolo ale taritigi te Iesus Kraist

© 1983, Wycliffe Bible Translators, Inc. All rights reserved. More Info | Version Index