Formulario de búsqueda

Sirach (Ecclesiasticus) 37

CAB. XXXVII.

1Jir dy chooilley charrey, Ta mish neesht e charrey: agh ta fer ayn, nagh vel agh carrey myr-yien.

2Nagh nee trimshey baaish eh, tra ta dty heshey as dty charrey chyndaït dty noid?

3O spyrryd chustey! cre veih haink oo stiagh dy lhieeney yn seihll lesh molteyrys?

4Ta sheshey ayn vees er cheu e charrey, choud as ta’n seihll cheet lesh: agh tra hig seaghyn er, bee eh n’oï.

5Ta sheshey ayn nee shassoo lesh e charrey, er graih e volg, as troggal y scape noi e noidyn.

6Ny lhig da cooinaghtyn dty charrey goll ass dty aigney, as ny jarrood eh ayns mean dty chooid seihlt.

7Jir dy chooilley choyrlagh, S’mie my choyrle; agh ta nyn lheid ayn, ver coyrle son nyn gosney hene.

8Bee er dty hwoaie jeh fer-coyrlee, as smooinee ro laue cre er t’eh shêgin (son ver eh coyrle ass e lieh hene) er-aggle dy der eh yn errey ort’s:

9As dy jir eh rhyt, ’Smie ta dty chooish: as lurg shen, dy gow eh yn cheu elley, dy chur-my-ner cre’n erree hig ort.

10Ny gow coyrle rishyn ta fo mee-ourys jeed: as ny soilshee dty aigney huggeysyn ta troo mood.

11Chamoo gow coyrle jeh ben, mychione ecksh t’ee geadagh mo-ee: chamoo jeh’n fer faittagh, ayns cooishyn caggee: ny jeh marchan, mychione marchantys; ny jeh kionneyder, mychione creck: ny jeh trooagh, mychione thurn-mie; ny jeh yn neu-vyghinagh, mychione kenjallys; ny jeh litcher, son monney erbee dy obbyr; ny jeh labbree-laa, son obbyr bleeaney; ny jeh litcher dy harvaant, mychione tarrooghys: da nyn lheid shoh ny cur geill ayns monney erbee dy choyrle.

12Agh bee dy kinjagh marish dooinney ynrick, eshyn ta fys ayd dy vel eh freayll annaghyn y Chiarn, ta e chree lesh dty chree hene, as bee eh trimshagh mayrt, mannagh jig dty chooishyn lhiat.

13As shass gys coyrle dty chree hene: son cha vel fer ’sy theihll ny s’firrinagh hood na ta shen.

14Son s’mennick lesh cree dooinney hene toiggal share y choyrt da, na shiaght arreyderyn heose er toor ard.

15As erskyn ooilley jean dty phadjer gys yn er smoo syrjey, dy jean eh dty immeeaght y leeideil gys raad yn ynrickys.

16Lhig da resoon goaill raad ayns dy chooilley chooish, as coyrle vie ayns dy chooilley obbyr.

17Ta’n caghlaa t’ayns y chree cowrit er yn eddin:

18As t’ad shoh nyn giare cronnit er: mie as sie, bea as baase: agh t’ad dy kinjagh fo reill y chengey.

19Ta fer ayn ta creeney, as gynsaghey ymmodee: agh ny-yeih er beggan foaynoo da hene.

20Ta fer ayn ta soilshaghey keeayll ayns e ghoan; agh ta foddey voish aigney-mie: cha bee eh shoh dy bragh creeney.

21Son cha vel grayse Yee mârish: agh coayl e cheïley er.

22Ta fer elley creeney da hene, as ta messyn e chreenaght ny vannaght ayns e veeal.

23Ta dooinney creeney gynsaghey e phobble, as s’beayn vees mess e chreenaght!

24Nee bannaghtyn lhieeney stiagh er y dooinney creeney, as bee goo bannee echey veih ooilley e ainjyssee.

25Foddee seihll dooinney ve er ny choontey: agh ta bleeantyn Israel erskyn earroo.

26Yiow dooinney creeney goo-mie mastey e phobble, as bee e ennym beayn.

27My vac, prow dty stayd anmey, liorish dty ymmyrkey-bea, as chea voish shen, ny ennys oo dy ve olk er dty hon.

28Son cha vel dy chooilley nhee vondeishagh da dy chooilley ghooinney, chamoo ta taitnys ec dagh annym ayns dy chooilley nhee.

29Ny bee jollyssagh gys gien mie, ny ro yoogh gys beeaghyn miljey.

30Son ta caghlaaghyn bee bun chingys, as bee jooghid er ny hyndaa gys goarley-gailley.

31Liorish jooghid ta ymmodee er yiarey nyn laghyn; agh bee yn dooinney sheelt bannit lesh lhiurid bea.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index