Formulario de búsqueda

NA TIKO MAI NA LEKUTU 29

Ai soro e na so levu ni davui, 1-6; kei na siga era vakamalumalumutaka kina na yalodra, 7-11; kei na bogi walu sa ia tiko kina na so levu ni vale taba ni kau, 12-40.

1Ia e nai kavitu ni vula, e nai matai ni siga ni vula, me dua kina na nomudou i soqosoqo tabu: dou kakua ni cakava kina e dua na cakacaka vakavuravura: a nomudou siga oqori ni uvu davui. 2Ia dou vakacabora nai soro kama, me ka boi vinaka vei Jiova: e dua na pulumokau sa gone, e dua na sipi tagane, e vitu na lami sa yabaki yadua sa sega na kena ca: 3ia na kedrai madrali laukana me madrai droka vinaka, sa veiwaki vata kei na waiwai, e tolu na omeri kei na pulumokau, e rua na omeri kei na sipi tagane, 4ka dua na omeri kei na lami yadua vei ira na lami vituvitu: 5ka dua na luve ni me mei soro ni valavala ca, me sorovaki kemudou kina: 6mei kuri ni soro kama ni vula vou, kei na kenai madrali laukana, kei nai soro kama sa ia tikoga, kei na kenai madrali laukana, kei na kedrai madrali liviraki, me vaka na kenai valavala, me ka boi vinaka, na ka sa vakacabori e na bukawaqa vei Jiova.

7Me dua talega na nomudou i soqosoqo tabu e nai katini ni siga e nai kavitu ni vula oqo; ka dou na vakamalumalumutaka na yalomudou: dou kakua ni cakava kina e dua na cakacaka: 8ia dou vakacabora ga nai soro kama vei Jiova, me ka boi vinaka; e dua na pulumokau sa gone, e dua na sipi tagane, e vitu na lami sa yabaki yadua; me ra nomudou ka e sega na kena ca: 9ia na kedrai madrali laukana me madrai droka vinaka, sa veiwaki vata kei na waiwai, e tolu na omeri kei na pulumokau, e rua na omeri kei na sipi tagane e dua, 10me dua na omeri kei na lami yadua vei ira na lami vituvitu: 11e dua na luve ni me mei soro ni valavala ca, mei kuri ni soro ni valavala ca sa ia kina na veibulubuluti, kei nai soro kama sa ia tikoga, kei na kenai madrali laukana, kei na kedrai madrali liviraki.

12Ia e nai katinikalima ni siga e nai kavitu ni vula me dua na nomudou i soqosoqo tabu; dou kakua ni cakava kina e dua na cakacaka vakavuravura, ia dou ia tiko na so levu vei Jiova ka bogi vitu: 13ia dou vakacabora nai soro kama, na ka sa cabori e na bukawaqa, me ka boi vinaka vei Jiova; e tinikatolu na pulumokau sa gone, e rua na sipi tagane, e tinikava na lami sa yabaki yadua; me sega na kena ca: 14ia na kedrai madrali laukana me madrai droka vinaka, sa veiwaki vata kei na waiwai, e tolu na omeri kei na pulumokau yadua vei ira na pulumokau e tinikatolu, e rua na omeri kei na sipi tagane e dua, vei rau na sipi tagane ruarua, 15ka dua na omeri kei na lami yadua vei ira na lami e tinikava: 16ka dua na luve ni me mei soro ni valavala ca; mei kuri ni soro kama sa ia tikoga, na kenai madrali laukana, kei na kenai madrali liviraki.

17Ia e nai karua ni siga me tinikarua na pulumokau sa gone, e rua na sipi tagane, e tinikava na lami sa yabaki yadua sa sega na kena ca: 18kei na kedrai madrali laukana kei na kedrai madrali liviraki kei na pulumokau, kei na sipi tagane, kei na lami, me tautauvata kei na kedrai wiliwili, me vaka na kenai valavala: 19ka dua na luve ni me mei soro ni valavala ca; mei kuri ni soro kama sa ia tikoga, kei na kenai madrali laukana, kei na kedrai madrali liviraki.

20Ia e nai katolu ni siga me tinikadua na pulumokau, e rua na sipi tagane, e tinikava na lami sa yabaki yadua sa sega na kena ca; 21kei na kedrai madrali laukana kei na kedrai madrali liviraki kei na pulumokau, kei na sipi tagane, kei na lami, me tautauvata kei na kedrai wiliwili, me vaka na kenai valavala: 22ka dua na me tagane mei soro ni valavala ca; mei kuri ni soro kama sa ia tikoga, kei na kenai madrali laukana, kei na kenai madrali liviraki.

23Ia e nai kava ni siga me tini na pulumokau, e rua na sipi tagane, e tinikava na lami sa yabaki yadua sa sega na kena ca: 24a kedrai madrali laukana kei na kedrai madrali liviraki kei na pulumokau, kei na sipi tagane, kei na lami, me tautauvata kei na kedrai wiliwili, me vaka na kenai valavala: 25ka dua na luve ni me tagane mei soro ni valavala ca; mei kuri ni soro kama sa ia tikoga, na kenai madrali laukana, kei na kenai madrali liviraki.

26Ia e nai kalima ni siga me ciwa na pulumokau, e rua na sipi tagane, e tinikava na lami sa yabaki yadua sa sega na kena ca: 27kei na kedrai madrali laukana kei na kedrai madrali liviraki kei na pulumokau, kei na sipi tagane, kei na lami, me tautauvata kei na kedrai wiliwili, me vaka na kenai valavala: 28ka dua na me tagane mei soro ni valavala ca; mei kuri ni soro kama sa ia tikoga, kei na kenai madrali laukana, kei na kenai madrali liviraki.

29Ia e nai kaono ni siga me walu na pulumokau, e rua na sipi tagane, e tinikava na lami sa yabaki yadua sa sega na kena ca: 30kei na kedrai madrali laukana kei na kedrai madrali liviraki kei na pulumokau, kei na sipi tagane, kei na lami, me tautauvata kei na kedrai wiliwili, me vaka na kenai valavala: 31ka dua na me tagane mei soro ni valavala ca; mei kuri ni soro kama sa ia tikoga, na kenai madrali laukana, kei na kenai madrali liviraki.

32Ia e nai kavitu ni siga me vitu na pulumokau, e rua na sipi tagane, e tinikava na lami sa yabaki yadua sa sega na kedra ca: 33kei na kedrai madrali laukana kei na kedrai madrali liviraki kei na pulumokau, kei na sipi tagane, kei na lami, me tautauvata kei na kedrai wiliwili, me vaka na kenai valavala: 34ka dua na me tagane mei soro ni valavala ca; mei kuri ni soro kama sa ia tikoga, na kenai madrali laukana kei na kenai madrali liviraki.

35E nai kawalu ni siga me dua na nomudou i soqosoqo tabu: dou kakua ni cakava kina e dua na cakacaka vakavuravura: 36ia dou vakacabora ga nai soro kama, na ka sa cabori e na bukawaqa, me ka boi vinaka vei Jiova: e dua na pulumokau, e dua na sipi tagane e vitu na lami sa yabaki yadua sa sega na kedra ca: 37na kedrai madrali laukana kei na kedrai madrali liviraki kei na pulumokau, kei na sipi tagane, kei na lami, me tautauvata kei na kedrai wiliwili, me vaka na kenai valavala; 38ka dua na me tagane mei soro ni valavala ca; mei kuri ni soro kama sa ia tikoga, kei na kenai madrali laukana, kei na kenai madrali liviraki.

39A veika oqo dou na kitaka vei Jiova e na nomudou so levu sa lokuci, mei kuri ni veika dou a bubului kina, kei na nomudou i soro dou sa vinakata mo dou vakacabora, na nomudou i soro kama, kei na nomudou i madrali laukana, kei na nomudou i madrali liviraki, kei na nomudou i madrali ni veivinakati.

40A sa tukuna ko Mosese vei ira na Isireli me vaka na ka kecega sa vakarota vei Mosese ko Jiova.

Vakavakadewa Makawa

©1974 Bible Society of the South Pacific

More Info | Version Index