Formulario de búsqueda

Exodus 2

Moses-aam Yuurtellra

1Uum nalliini angun Levi-am ilakutain iliit nulirturtuq Levi-am cali kinguvranek. 2Arnaq-llu qingartuq qetunrangluni-llu. Tangrramiu-llu kenegnartacia iirumaa iraluni pingayuni. 3Tau͡gaam iirumasciigaliamiu kelugkarrlugnek tegulluni tupigluki assigtaliuq, taarmek-llu mingugluku imangarkaunrirluku. Mikelnguq-llu ekraarluku can'get acetulriit kuigem cen̄iini akuliitnun ellia. 4Taum-llu mikelnguum alqaa nangengqauq yaaqvaarni tangvagluku qaillun pillerkaa.

5Tua-llu Pharaoh-m pania atrartuq kuigmun ervuqeryarturluni, pisten̄i-llu cen̄akun piyuanginanratni Piqerluni tangertuq assigtamek can'get acetulriit akuliitni, pistem̄inun-llu arnamun aqvavkarluku. 6Pharaoh-m panian ikircamiu tangrraa mikelnguq tan'gaurluq qialuni. Takumcukluku-llu qanertuq, “Una Hebrews-aat mikelnguita ilakelliniat.”

7Tua-llu mikelnguum alqaan Pharaoh-m pania aptaa, “Ataki arnamek Hebrew-mek aqvallii aamarrluku anglicaritestekarpenek.”

8Tua-i Pharaoh-m panian kiugaa, “Kitaki tuaten pii.” Tua-i-llu nasaurluq ayagluni mikelnguum nakmiin aanii aqvaluku. 9Egypt-aarmiut angayuqrata panian arnaq qanrutaa, “Teguluku una aamarrluku anglicarru akilirciqamken.” Tua-i taum arnam mikelnguq teguluku anglicaraa. 10Mikelnguq-llu anglirian Pharaoh-m panianun ayautaa. Taum-llu yukliutaa qetunraqsagulluku acirluku-llu Moses-aamek, qanerluni, “Mermek tegullruamku aciraqa Moses-aamek.”+

Moses-aaq Qimagtuq Midian-aamun

11Moses-aaq-llu tua-i angliriami ayagtuq nunalluki nakmiin ilani Hebrews-aat, tangerrluku-llu qaillun calirpagcecimaciat. Tangertuq-llu Egypt-aarmiumek tuqucilriamek Hebrews-aat iliitnek, Moses-aam-wa nakmiin yuin iliitnek. 12Moses-aam avatni kiarqaarluku tangvagtailami kitumek tuqutaa Egypt-aarmiu, temii-llu qau͡gyamun iirluku. 13Unuaquan utertellermini tangertuq malrugnek Hebrews-aagnek callulriignek. Qanertuq-llu ayagnercillermun, “Ciin tengluarciu Hebrews-aarullguten?”

14Angun-llu kiuguq, “Kia atanrurtaten cuqcisten͞gurrluten-llu wangkutnun? Tuquteqatararpenga-llu-qaa wiinga Egypt-aarmiu tuqutellrucirpetun?” Moses-aaq-llu alingalliimi umyuartequq, “Yuut taringellrulliniat qaillun pilqa.” 15-16Pharaoh-m-llu tamana niicamiu Moses-aaq tuquituraa, tau͡gaam Moses-aaq qimagtuq ayagluni-llu Midian-aam nuniini uitayarturluni.

Erenret iliitni, Moses-aaq aqumgainanrani elakam caniani, Midian-aam agayulirtiin, Jethro-m, panii malrunelgen taigut mermek-llu imirluki ungungssit merviit atameng tamakut ungungssiutai mercetnaluki. 17Tau͡gaam qusngiliurtet tailuteng ayagcetait Jethro-m panii. Tua-i Moses-aam nangerrluni ikayurai mertelluki-llu katngautait. 18Utercata atiita aptai, “Ciin unuamek uterteqanqegpakarceci?”

19Taukut-llu kiugaat, “Egypt-aarmium ikayullruakut qusngiliurtet piyaaqellratni elliin-llu mertaulluta ungungssit mertelluki.”

20Panini qanrutai, “Nauwa-mi? Ciin uniceciu? Kelegciu nerellgucirniaraakut.”

21Moses-aaq-llu uitayugtuq tuani, Jethro-m-llu paniminek Zipporah-mek nulirturcelluku. 22Irniuq-llu nulirra qetunrangluni. Moses-aaq-llu umyuartequq, “Wii allanruunga maani nunami, taumek aciraqa Gershom-aamek.”+

23Allrakut tamakut kinguatgun Eqypt-aam angayuqra tuquuq, tau͡gaam cali Israel-aam yuin qinuciaratkaat teguarullerteng. Qayagaut-llu ikayuusqelluteng, qayagaullrat-llu Agayutem qilagmelnguum niitaa. 24Agayutem niicamiu yuuniarallrat neq'akaa akqutkellni Abraham-aamun, Isaac-aamun, Jacob-aamun-llu. 25Agayutem-llu tangrraa Israel-aam yuin kevgauluki cakviullrat kusguyugluni-llu.

Yupik Bible

Yupik Bible © 2012 American Bible Society

More Info | Version Index