Formulario de búsqueda

BILANGEN 6

Peraturen kerna Nasir

1TUHAN nuruh Musa, 2mereken pengajaren si tersurat i jenda man bangsa Israel. Tep-tep dilaki ntah diberu si erbulawan ras TUHAN gelah ia jadi sekalak nasir, janah ipeserapna dirina man TUHAN, 3arus ipantangkenna anggur ras bir. La banci inemna inemen kai pe si ibahan i bas buah anggur nari ntah man buah anggur si mbaru denga ntah pe si enggo kerah. 4Sedekah ia sekalak nasir denga, la banci ipanna kai pe si rehna i bas batang anggur nari; biji anggur ntah kulit buah anggur pe la banci.

5Kidekah ia i teruh padan nasir denga, la banci iguntingna bukna ntah pe ercukur. Ia teriket man padan e asa dekahna ia ipeserap man TUHAN, janah arus ipelepasna bukna ras janggutna turah. 6-7Bukna jadi sada tanda maka iserapkenna dirina man Dibata, e maka la banci ibahanna dirina keliamen alu lawes ndeheri mait, aminna gia mait e bapana jine ntah pe nandena, seninana ntah pe turangna. 8Sedekah ia sekalak nasir denga, ia ipebadiaken guna TUHAN.

9Adi bukna si ipebadiaken e keliamen erkite-kiteken ia kundul rembak ras sekalak jelma si mate rempet, arus itimaina pitu wari, janah kenca e icukurna bukna ras janggutna; alu bage ia enggo jadi bersih rikutken peraturen agama. 10I bas wari si pewaluhken arus ibabana dua ndukur ntah pe dua nderapati man imam i bas dalan bengket ku bas Kemah Perjumpan. 11Sada arus ipersembahken imam jadi persembahen pengalemi dosa, janah si debanna jadi persembahen tutungen, guna erbahan acara pembersihen man bana sabap enggo ia pedeges ras mait. I bas wari e kang arus ipebadiakenna ka mulihken bukna. 12Janah ipersembahkenna mulihken man TUHAN waktuna jadi sekalak nasir. Waktu si arah lebe lanai ikira, sabap bukna si enggo ipebadiaken e enggo keliamen. Guna persembahen tebusen arus ibabana sada anak biri-biri umur sada tahun.

13Adi sekalak Nasir enggo ndungi padan si enggo ibahanna, arus ilakokenna acara enda. Lawes lah ia ku dalan bengket ku bas Kemah e 14janah ipersembahkenna man TUHAN telu asuh-asuhen si la lit sitik pe man pandangen. Asuh-asuhen e, e me kap: sada anak biri-biri bajarna umur sada tahun guna persembahen tutungen, sada anak biri-biri beru-beru umur sada tahun guna persembahen kerna dosa, ras sada bajar biri-biri guna persembahen persadan. 15Tambah si e arus pe ipersembahkenna sada raga roti si la tama ragi, e me: roti si mekapal si ibahan i bas tepung nari icampur ras minak saitun ras roti si menipes si icalehken ku bas minak saitun. Janah tambah si e gandum ras anggur asa arusna.

16Kerina si enda arus iendesken imam man TUHAN bage pe persembahen kerna dosa ras persembahen tutungen arus ipersembahkenna. 17Bajar biri-biri e arus igelehna jadi persembahen man TUHAN jadi sada persembahen persadan, janah ipersembahkenna e ras roti si i bas raga ndai. Gandum ras anggur pe arus ka ipersembahkenna. 18Kalak nasir ndai arus ncukur bukna i bas dalan bengket ku bas Kemah e, jenari itamakenna bukna ku bas api ingan nutung persembahen persadan ndai.

19Kenca bage, tupung paha si arah lebe bajar biri-biri ndai enggo itasakken, arus ibuat imam, jenari itamakenna radu ras sada roti si mekapal ras sada roti si menipes si i bas keranjang ndai ku bas tan kalak nasir ndai. 20Seterusna, imam arus ngendesken si enda kerina jadi sada persembahen si khusus man TUHAN; enda kerina jadi sada persembahen si badia man imam, tambah-tambah tenten ras nahe biri-biri e si kin sikerajangen imam rikutken undang-undang. Kenca si enda kerina, kalak Nasir ndai banci minem anggur.

21Enda me peraturen-peraturen man kalak Nasir; tapi adi sekalak Nasir erbulawan mereken persembahen lebih asa persembahen si iperluken rikutken peraturen, arus maka ipersembahkenna sue ras isi bulawanna e.

Pasu-pasu imam

22TUHAN nuruh Musa, 23gelah ikatakenna man Harun ras anak-anakna guna make kata-kata si tersurat arah teruh enda i bas ia masu-masu bangsa Israel:

24Ipasu-pasu janah ikawali Dibata kam;

25siang ayo Dibata ersinalsal ibabondu; janah melias ateNa man bandu

26itatap Dibata ku kam, janah malem atendu ibahanNa.

27Janah nina TUHAN, “Adi ibelaskenna gelarKu i bas pemasu-masun man bangsa Israel, e maka Kupasu-pasu ia.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index