Formulario de búsqueda

Luk 15

Nkuma ya kimeeme kyadziimbila

(Mat 18.12-14)

1Batori ba mpaku bobanso na bangaa-masumu bakokosolo kuri Yesu mu kumuywiila. 2Bafarisi na batini ba mangisi bamunguta na baleele ti: «Muutu wumawu wukwetaambula bangaa-masumu na wukwedya kintwaari na bo.» 3Nde wabateele nkuma yimayi, waleele ti: 4«Nkya muutu mu beenu, habaanaa wuri na nkama bimeeme, ngo dziibisiri kimosi mu byo, lo wahele kusisa makuumi wa na wa ku nsi yankatu, na weensi ku kweesaka kya dziimbila natee wukidzuukiri? 5Bu kayidzuukiri, wukiteetikiri ha yulu maheembu maandi na wuri na kiminu. 6Bu kabvutukiri ku nzo, teeriri banduku na bambaasi, na wubaleeriri ti: "Keembee kintwaari na me, bukuri me dzuukiri kimeeme kyaami kyabee kyadziimbila." 7Me nyiluleele ti, bwobumosi, kiminu sa kyabvula mu mayulu mu ntoono ngaa-masumu mosi wuyiingiri madyeele ti na mu makuumi wa na wa basuunguma, bahele na nzala nyiingulu madyeele.»

Nkuma ya mupata wadziimbila wu badzuukiri

8«Bunu pe nkya mukyeetu wuri habaanaa wuri na mipata kuumi, ngo kadziimbisiri mupata mosi, lo wahele kunamuka mwiinda, na kukoombolo nzo mu kusaka nde mu bunkete, natee ku kamudzuukiri? 9Bu kamudzuukiri, teeriri banduku na bambaasi na kuleele ti: "Keembe kintwaari na me, bukuri me dzuukiri mupata wubee nyadziimbisa." 10Bwobumosi, me nyiluleele ti, kuri kiminu, ha busu bwa bambasi ba Nzaambi, mu ntoono ngaa-masumu mosi wuyiingiri madyeele.»

Nkuma ya mwaana wadziimbila wu bweesiri kumonoko

11Yesu wabweese kuleele ti: «Muutu mosi waba na baala boolo. 12Wubvuriri bulesi mu bo, waleele kuri taayi ti: "Taata, ha me kikuuku kya lubaku kya me!" Taayi wabakabula bya mbakulu bya kidziingu. 13Biluumbu byalaka bu byaluta, wubvuriri bulesi wayarika bya nde byobinso, wayende ku nsi ya la. Wamana kubvuka lubaku lwaandi, mu kidziingu kya mawaamba. 14Bu kamana lubaku lwaandi lwolunso, nzala ya makwa yayisa mu nsi yiyo, na nde wabaandika kutikila. 15Wasa kimbaasi na mosi mu bangaa-nsi yiyo, na muutu wunde wamuheeke ku manseke ma nde mu kwediisila bangulu. 16Nde waba na nzala kuyukuta mu byandya bya bangulu, ngo wumuha nde pe. 17Wakoto mu kwetsima nde-meene na waleele ti: "Bangaamba ba taata balaka bari na byandya bya buukula, kasi me nyiri mu kufwa mu nzala hamaha. 18Me ntelemaana, bvutukiri kuri taata na nyemuleele ti: Taata, me nyasii masumu kuri Nzaambi na kuri ye. 19Me nyahele kubweese kuyelemene ti banteele mwaana ye. Hololo me bunu mosi mu bangaamba baaku!" 20Nde bu kateleme, wayende kuri taayi dyaandi.»

«Bu kaba wakiri la, taayi dyaandi wamutalila, wamono ngebe kunsa mutima, nde wadzumuna, wadumukina mwaana mu nkiingu, na wamunyumutina. 21Mwaana waleele kuri nde ti: "Taata, me nyasii masumu kuri Nzaambi na kuri ye. Me nyahele kubweese kuyelemene ti banteele mwaana ye." 22Taayi waleele kuri bisari byaandi ti: "Mawasu, twaalee dzweele dibvuriri bubwete, na mulwiike dyo, mulwiikee se lungele mu kooko, na masapaatu mu miilu. 23Twaaleenu mwaana ngoombo watoloko, mudzusee na tusee munkeembu, 24bukuri mwaana me wumawu, wabee wafwa, ngo bweesiri kuba wamwooyo, wabeeri wadziimbila, ngo bweesiri kumonoko." Bo babeke kukeembe.»

25«Mwaana waandi wa mukuutu waba ku manseke. Bu kabvutuka, wakokosolo bebele na nzo, wayuka baatu bari mu kuyimbila na kukina. 26Nde wateele mosi mu bisari, na wasaka kuyaaba bibyo ka byaba nki. 27Nde waleele kuri nde ti: "Mpaangi ye mwaakwiisa, ngo taayi dya ye kadzusiri mwaana ngoombo watoloko, bukuri nde taambiri mwaana kuri wamutsiina." 28Nde wabaka nkesi na wabisa kukoto. Taayi dyaandi wapala na wamuyingukila. 29Nde wabvutula na waleele kuri taayi ti: "Mono, mibvu myalaka me nyiri mu kusalilaa ye, me nyahaakuri lutumu ti lumosi lwa ye ko. Na ye wakiri kumpa pe, ti mwaa-mwaana ntaba, mpisi me tsa munkeembu na banduku baami. 30Ngo kasi mwaana ye wu, wumeenye kwebvuka lubaku lwa ye lwa kidziingu, bo na bakyeetu ba biyala, ye mwaamudzusila mwaana ngoombo yatoloko." 31Taayi waleele kuri mwaana ti: "Mwaana waami, ye wuri na me mu mantaangu momanso, byobinso bya me bya ye! 32Bu bee bwayelemene mu kusa munkeembu na kumono kiminu, bukuri mpaangi ye yi wabee wafwa na bweesiri kuba wamwooyo; wabee wadziimbila ngo bweesiri kumonoko!"»

Musamu Wamubwete

©2013 Bible Society of the Republic of Congo

More Info | Version Index