Formulario de búsqueda

Luka 21

Garup Tap Atu Itar Pat Ilo Ye Depe Ke Bareme Mai Ke Sungunu

(Maka 12:41-44)

1Motong la Yesu be matan gaga a matan la ngan ikamata di tooltool ballingadi yo titartar pat kidi lo ye depe ke tarungu pat ke bareme mai ke sungunu nga, 2ngan le ikamata garup tap atu lapau. Ngan ya in ballingana tiap, le la itar pat mitiap kooroonoo ru leu la ilo ye depe ke tarungu pat tani nga. 3Yesu ikamata garup tap tani, le taun imadit le iwete nen, “Awete pang moolmool nen, garup tap i ballingana tiap, bong itar pat mai san le illos pat yo di tooltool kapala titar nga, 4yesoo, di ngan tooltool ballingadi le pat kidi alunu san, bong titar mai tiap. Ngan garup i ballingana tiap, bong ya in iraia lono be itar pat ki tina le imot yo be iyimi kaningi panga ye nga, ngan le imot a ilo ye depe ke tarungu pat.”

Yesu Iwetewete Ye So Yo Be Pombe Pang Dama Ni I

(Matiu 24:1-2; Maka 13:1-2)

5Yesu di galiunu pattu tiparwetewete ye bareme mai ke sungunu yo tikamata, ngan dook mata san ye pat yo tire ye nga, inbe ye so dook mata kapala yo di tooltool tikap a man timoromoro bareme tani ye nga. Bong ngan Yesu iwete pang di nen, 6“Awete pang nen, pat le so tina yo nookoot kakamata ngan iken dook mata ye bareme mai ke sungunu i, bong lal atu yo be pang dama ni ngan pombe i, ngan ole pat tina ngan atu sa yo be iloko lo ene pono dawa ben nookoot nga, ngan tiap. Bong ole tiraukedekede di le imot a timol du tana le tiken kidi kidi.”

7Le nga di tooltool tina ngan titoro Yesu nen, “Pannoongoo, ole soo lal be so tina ngan pombe ye i? Inbe soo tarkilanga be amkamata muku, ngan lomam galanga ben so tina ngan ole pombe moolmool ye i.”

8Motong la Yesu iyei ne, “Kin kakamatang dook leu, le kin tool sa ikap lungunu yang be. Yesoo, di tooltool alunu ole timan pang yang man tipootoo ek, inbe tiyei ne, ‘Au tool tani naii!’ Inbe ole tiyei ne, ‘Lal tani in iman potai oo.’ Bong kin kalongo betanga kidi a katoo di be. 9Kumata ye kene yo be kalongo bingi ke patokongo mai, inbe talngamim rau be di tooltool ke tana mai atu be tiparsu ye betanga sa le be tiye di diedi tipatoko nga, ngan kin katattadai be! So tina yo nen nga ole pombe moolmool muku, bong so yo awete pang ye nga, ngan lal ki o pombe tiao.”

10Motong la Yesu iwete pang di mulu nen, “Ngan di tooltool ke tana mai atu ole timadit a tiye di tooltool ke tana mai san tipatoko. Inbe di tooltool ke tool kuto mai atu ole timadit a tiye di tooltool ke tool kuto mai san tipatoko. 11Inbe nauningi mai ole itak ye tana i, inbe pitolo mai ole pombe, inbe matamatenge maimai ole pombe ye malala kapala a igarung di tooltool lapau. Inbe matamim pang lang katene nga, ngan ole kakamata mos matana matana pombe, a be nen ngan iyei di tooltool a titattadai le dook tiap yege.

12“Bong so tina ngan le imot ole pombe tiao, inbe di koi kiau ole tikamatang yo katoo au nga, ngan ole tikau ang a tiparamang a tigarungang. Inbe ole tikau ang sa lo kakodo ye ni ke karatanga betanga ye rumu kidi Yuda ke gaongo in lono, inbe titarang lo kayepe rumu dook tiap kidi talnga dikidiki lono. Inbe ole tikau ang sa lapau lo kakodo dama kidi tooltool kuto maimai yo matadi kala tana mai kiang nga, inbe di tooltool maimai yo matadi kala malala kiang nga, ngan matadi, yesoo ye yo ang ngan katoo au nga. 13Ngan dada tina yo tiyei pang nen nga, ngan be nen a tiso dada pang be kawetewete bingi dook mata kiau pang di. 14Le kin lomim modoko ye betanga yo be kawete a karau betanga kidi ye, ngan be, 15yesoo bong au tauk ole atar betanga dook mata yo be kawete ngan lo lomim, inbe akaua lo galanga dook mata yo be karau betanga kidi ye i, in pang. Ngan nen le di koi kiang tina ngan o ke be tiwete be nga kallungu, a be nen ngan tirautoo betanga kiang tina yo kawete nga, ngan tiap. 16Inbe ye kene tani in, ole di tamamim le tinamim, tiye di toomim le taimim, inbe di sokamim le di tooltool kiang ole katedi malmal pang a titarang la di koi kiang baedi, inbe tiraumatamatang kapala a kammata. 17Ngan di tooltool le imot ole tiyei koi pang a be tigarungang, yesoo ang ngan katara lomim medana ye betanga kiau inbe katoo au. 18Bong kutomim raunu tina le imot nga, ngan o ke be atu sa ilene tiap. 19Ngan nen le kakodo le kamede dook ye betanga ke Maro, ngan la be ole kakaua yepongo dook mata yo taukan motingi in nga.”

Yesu Iwete Be Ole Tigarungu Yerusalem

(Matiu 24:15-21; Maka 13:14-19)

20Motong la Yesu iwete pang di mulu nen, “Ye kene yo be kakamata di tooltool ke patokongo nga be man tikodo le tiwakaia malala mai Yerusalem nga, ngan ole lomim galanga nen, lal yo be man tigarungu malala mai tani in ye i, in o potai oo. 21Le be kakamata so nen pombe nga, ngan ang tooltool yo kayepe ye tana mai Yudia nga, ngan kakoo tarai a kalo pang kawal. Inbe ang tooltool yo kayepe malala mai tani in lono nga, ngan kapas a kadu ke diki. Inbe ang tooltool yo kayepe ke diki nga, ngan kin kalo pang malala mai tani, in lono be. 22Awete pang nen, yesoo ye kene tani in lal ke Maro be iyemenai di tooltool ke Isrel tina yo tiwala muridi panga nga. Ngan so tina ngan ole kanono pombe moolmool ben tina yo muku ngan di Maro koonoo tiwodo betanga ki ilo ye rau nga. 23Ye kene tani in di garup yo kapodi nga, inbe di garup yo tiyei borrenge ye di natudi a tipayinin di nga, ngan barau, ole imoo pang di yo be tikoo nga. Ngan awete nen, yesoo urata dook tiap ki taunu la be pombe ye tana i, inbe Maro ole ipaposo kate malmal ki yo be igarung di tooltool tina yo tiwala muridi panga nga. 24Ngan di koi kidi Yuda tina, ole timan man tirau di a titaramatamata di kapala ye pul ke patokongo. Inbe di Yuda tina ngan kapala ole tikap di a tiparama di a la titar di ye tana maimai kapala. Inbe di tooltool yo tipa ye rara kidi Yuda tiap nga, ngan ole timan man tidada di tooltool tina yo ke Yerusalem nga, ngan podi le lo ye lal yo Maro itaru pang di be urata kidi tani yo tiyeii i, in imot ye i.”

Pang Dama Ni Ngan Ole Tool Moolmool Ke Maro Imulu A Isi

(Matiu 24:29-31; Maka 13:24-27)

25Motong la Yesu iwete pang di mulu nen, “Ye kene tani in nga, ngan ole tarkilanga matana matana la be pombe ye ke le taudu inbe ye di kanpitiki nga. Inbe ye tana mai i nga, ngan di tooltool ke ni mai i le imot ngan ole titattadai inbe lodi gurrungu dook tiap ye yo tilongo mununu ke dugu yo iyit le ilo ete ni a popobe nga. 26Ngan Maro ole itak so yo ke lang katene nga, a be nen ngan di tooltool tikamata ngan ole lodi galanga ye so dook tiap tina yo be pombe ye tana i nga. Ngan nen le di tooltool tina kapala ole titattadai ye yo tikamata so nen nga, ngan ole matadi taltalai a timol du tiken tana. 27Inbe ye kene tani in nga, ngan di tooltool ole tikamata Tool Moolmool ke Maro iyepe ye eng tene, inbe ipa ye gurana ke Maro inbe nunngana maiyoko a isi. 28Le ye kene tani yo kakamata so tina ngan be pompombe ye in nga, ngan kamadit le lo kakodo, inbe katada pang ete. Yesoo, lal tani yo Maro be ikau ang a ipamulang ye i, in isi potai oo.”

Yesu Ikatte Betanga Ye Kai Yo Ene Pik I

(Matiu 24:32-35; Maka 13:28-31)

29Yesu iwete pang di nen a imot, motong ikatte betanga atu pang di. Iyei ne, “Ai, matamim too ye kai pik, inbe ye kai yo kapala nga le imot lapau. 30Ye kene yo kakamata di kai tina ngan be suddadi pompombe ye baedi a titar raudi paunu nga, ngan ole lomim galanga nen, rai mai o potai oo. 31Ngan gaongo leu, ye kene yo be kakamata so tina nga be pompombe ye in nga, ngan ole lomim galanga nen; mooloo tiap, inbe dada yo Maro be matan kala di tooltool ki ye i, in ole si pombe mallangana.

32“Awete pang moolmool nen, di tooltool yo nookoot tiyepe matadi rerene go nga, ngan ole timmata tiao, inbe so tina le imot yo awete pang ye nga, ngan ole pombe. 33Lang le tana nga ole tilledi, bong betanga yo kiau nga, ngan o ke be kasin pa ilene, ngan tiap.”

Yesu Di Galiunu Be Tikawai Ye Di Dook

34Motong la Yesu iyei ne, “Ngan nanga, kin kakap tutang dook leu. Le kaningi yo be kakan, inbe ran yo be kayin nga, ngan ikap matamim mata be. Inbe kin lomim modoko mata ye yepongo kiang ke tana i lapau be. Ngan kumata le so yo nen ngan be ikap matamim mata nga, ngan lal ke Tool Mai tani in ole pombe pang yang le ipatakrai ang, 35dawa ben di asara yo lodi galanga ye dowo tiap le la titingi ye nga. Ngan awete pang nen, yesoo lal tani in ole pombe pang ye di tooltool yo tiyepe ye tana mai i le imot nga. 36Ngan nanga, kanakana ngan ang tapmim kakawai yang dook, inbe kakodo le kamede ye pataraungu pang Maro. Ngan la be lal ke so dook tiap tina ngan be pombe nga, ngan o ke be igarungang tiap. Inbe kapatarau ye lal yo be Tool Moolmool ke Maro isi be si ikarata betanga kidi tooltool ye in nga, ngan ole ang le imot lo kakodo dama ki, ngan o ke be moomoomim ye tiap lapau.”

37Yesu iwete nen a imot, motong la ye ke kanakana nga, ngan ole ilo koongoo lono ke bareme mai ke sungunu, inbe ipatomonai di tooltool. Inbe ye rrai kanakana nga, ngan ole ipa a ilo ye kawal yo ene Olip i, a lo bong ngan iken nango. 38Inbe ye muntu kanakana nga, ngan ole di tooltool malala mai timadit muntu bongmai koot a tilo koongoo lono ke bareme mai ke sungunu a lo titar talngadi ye patomonaingi ke Yesu.

Rau Ke Maro

© Wycliffe Bible Translators, Inc. All rights reserved

More Info | Version Index