Formulario de búsqueda

Aposol 24

Paulu Ikodo Dama Ke Pilek Ye Ni Ke Karatanga Betanga

1Paulu tani in du iyepe, le nga ke limi iman a ila, motong la tool kuto mai ke paroranga so pang Maro yo ene Annias i, in iye di tooltool maimai kidi Yuda pattu, inbe tool lo galanga atu ke ger kidi Rom yo ene Tetulas i, in iye di tisi pang Sisaria. Di ngan tisi be si tipatokodo Paulu dama ke tool kuto mai Pilek, inbe tiweteweta a tipaposi ye busunu ki nga. 2Tisi, motong la kene yo tool kuto mai tani in ikiui Paulu a ilo ye in nga, ngan le Tetulas tani in imadit le lo ikodo, inbe iwete panga ye Paulu nen. Iyei ne, “Tool mai Pilek, ye kene yo kuyei tool kuto mai ye in nga, ngan ong in kulonam Yuda dook mata le amyepe ye lo silene dook mata san, le patokongo le so dook tiap sa be pombe pang yam, ngan tiap. Inbe kuyei dada dook mata pam, le kulon di tooltool kiam a kukarata so alunu kaiye yo muku ngan iken dook tiap nga le dook mata mulu. 3Ngan nen le amkamata so tina yo kuyei nga, ngan le lomam dook mata kaiye, inbe amwete lo ponana kiam mai san pong. 4Bong ole nen ngan ayolo betanga mata le ayakalong. Le au i lok be atorong a be lom dook mata pam nga, ngan kulongo betanga kiam modono nga.

5“Am nga ampuske tool i ben ya in tool ke yeingi moonoo. Le ya in la ipa be ipamadit malmal le patokongo kataunu ye di tooltool ke Yuda yo tiyepe ye ni mai i le imot nga. Inbe ya in la imuku pang di tooltool yo tiyege dada moolmool kiam Yuda a la tiyeie budanga san yo tiwete ene ye di Tooltool ke Nasaret i. 6-7Inbe ya in ikapye be igarungu bareme mai ke sungunu, a nen ngan giri leu ye Maro matana i, ngan la le amkauu a amparama nga.+ 8A nen ngan ole ong taum kutor panini, ngan ole lom galanga dook ye ya taunu betanga ki ye so tina le imot yo amkauu se ampatokode ye ni ke karatanga betanga, inbe awete pong ye nga.”

9Tetulas iwete nen a imot, motong la di Yuda tina ngan tikata suanga ye betanga ki a tiyei ne, “Betanga tina le imot yo Tetulas in iwete nga, ngan moolmool.”

Paulu Iwete Betanga Ki Pang Pilek

10Di Yuda tina ngan tiwete nen a imot, motong la tool kuto mai tani in iyei tomonai ye baene pang Paulu be iwetewete. Motong la Paulu iwete panga nen, “Au i lok galanga nen, ye rai alunu kaiye la kuyei tool ke karatanga betanga pang di tooltool ke Yuda tina nga le imot nga. Ngan nen le au i lok ponana kaiye be akodo dama kiong, inbe arau betanga kidi. 11Kumata be kutor panin di tooltool nga, ngan ole lom galanga pattu leu nen. Ye kene yo alo pang Yerusalem be lo asung ye in nga, ngan le so ben ke sangaul be ru leu la iman a ila koot nga. 12Ngan alo nga, ngan le di Yuda nga tikamatau pa be aye tool sa amparsu ye betebetanga koongoo lono ke bareme mai ke sungunu pitiap. Inbe tikamatau pa be asokkara di tooltool sa lodi a tikap malmal pang di diedi ye rumu kidi Yuda ke gaongo in lono, too ye ni sa ye malala mai i, ngan tiap lapau. 13Ngan nen le betanga kidi yo nookoot nga se tisopo koodi ye pau ye ni ke karatanga betanga nga, ngan sa moolmool tiap. 14Bong betanga yo moolmool in nen. Au i atoo Dada ke Yesu yo tiweta ye budanga san ni. Inbe asung pang Maro yo kidi sasa kiam Yuda i, inbe atara lok medana ye betanga ke ger ke Mose, inbe ye betanga kidi Maro koonoo yo tiwodo nga, ngan le imot. 15Ngan dawa ben di ngan titar matadi a tinama Maro be ipamadit di tooltool yo timmata koot nga, ngan gaongo leu, au lapau atar matak a anamu be ipamadit di tooltool yo noonoodi inbe di tooltool yo dook tiap nga, ngan a timadit mulu nga. 16Ngan nen le kanakana nga, ngan akapye be le atoo dada dook mata yo lok wetewete ye be atoo nga, ngan ye Maro matana, inbe ye di tooltool nga matadi lapau.

17“Ngan au i adu ayepe ye malala kapala ye rai alunu kasin, motong la amulu a along a alo pang Yerusalem nga, ngan alo be lo akap pat le so pang di tooltool kiau yo ballingadi tiap nga, inbe akap so kapala pang paroranga lapau. 18Ngan au i lok be alo bareme mai ke sungunu lono, le nga atoo dada yo be akarata tinik le igalanga dook mata ye Maro matana in a imot, motong la alo pang bareme mai ke sungunu lono. Le ye kene tani in tikamatau yo ayepe koongoo lono ke bareme mai ke sungunu nga, ngan ayei urata ke paroranga so. Bong ye kene tani in aye di tooltool malala mai sa amyepe, too aye di tooltool sa amparsu a koomam ngaungaube, ngan tiap lapau. 19Bong ngan di Yuda kapala yo tipa ke tana mai Esia a tise nga, ngan di la se tikau au a tiparamau nga. Le kumata be di ngan kadi betanga sa pau nga, ngan nookoot nga di tapdi tise a se tikodo dama kiong, inbe tiwetewetau pong a tipaposau ye busunu kiau. 20Kumata be tiap nga, ngan di tooltool tina yo tiyepe lapau ye kene yo akodo dama kidi tooltool kuto maimai kidi Yuda ye ni ke karatanga betanga nga, ngan be nen nga, ngan di tapdi tise a se tiwete pong ye soo busunu yo akapsap ye i. 21Ngan au i lok tar be betanga atu yo aweta i, in la o lodi ponana ye tiap i. Ye kene tani yo lo akodo kataunu kidi ye in nga, ngan awete le kook maimai nen. Ayei ne, ‘Au i atara lok medana nen, be di tooltool yo timmata koot nga, ngan ole timadit mulu. Ngan ye punu in la le nookoot nga tikau au se akodo dama kiang ye ni ke karatanga betanga i.’ ”

22Ngan Pilek tani in lon galanga dook mata ye moomoo kidi tooltool yo titoo Dada ke Yesu nga. Ngan nen le nga Paulu iwetewete a imot, motong la idiki lal ke karatanga betanga tani in pang dama, inbe iwete pang di Yuda nen, “Nga ole kanam kasin, le kene yo be tool kuto mai ke patokongo yo Lisias i, in isi, ngan la be akarata betanga kiang i nga.” 23Motong la iwete pang tool turana bulbulini ke patokongo atu be ikaua Paulu mulu lo itaru lo rumu dook tiap kidi talnga dikidiki lono. Bong kin ikodo kala mata be, inbe imalum pang di tooltool ke Paulu tani be tikap so man tikap panga a tiloni ye.

24Tiyepe a ke kapala iman a ila, motong la Pilek tani in iye rimana Durusila timan. Ngan Durusila tani in garup Yuda lapau. Le nga timan, motong la Pilek tani in iwanga pang Paulu be iman a man ilongo betanga ki. Motong la Paulu tani in man iwete pang di ye dada yo be tatara lodo medana pang Yesu Kirisi ye i. 25Motong la yeisa be Paulu idik koonoo mulu a iwete nin dada yo be tayei tool noonoonoo ye i, inbe ye dada yo be takaptutidi dook ye yepongo kiidi, inbe ye lal yo Maro itaru be iyemenai di tooltool ye i, in pang di nga, ngan Pilek tani in ilongo le itattadai. Le nga iyei ne, “Dookoot! Ole kuyegam a kula ngan. Le kene atu be akamata lal sa dook mata nga, ngan la be awanga pong mulu a kuman nga.” 26Pilek tani in iwete nen, motong la iyepe a itar tinini pang Paulu. Ngan iyeisa ole Paulu ikaua kan pat sa be ipallumu ye, a nen ngan lono dook mata a imalum panga, ngan ipadua ye rumu dook tiap a ila. Ngan nen le nga ye ke alunu kaiye la iwanga pang Paulu be iman a man yaru tiwetewete nga.

27Tiyepe le nga rai ru iman a ila, motong la Posius Pestus be ilono Pilek a ikoli ye urata ki. Le nga Pilek tani in lono be iyei di Yuda tina a nen ngan lodi ponana ye, le iyege Paulu sila iyepe rumu dook tiap kidi talnga dikidiki in lono.

Rau Ke Maro

© Wycliffe Bible Translators, Inc. All rights reserved

More Info | Version Index