Formulario de búsqueda

1 MA KORINTOSE 10

Paulo Ɔtã Mmara I Aɣɔ Isɔrɛ Iso.

1Wũ manyii, lobie sɔ mianyigi ara wa loba i bo mawa ma losiai Mose iso. Idɔdɔ ɔsɛgu ma, ikɔ ma ɔɖuɖu fiɛ maki i Ɔpo Rɛtɛa ndɛ̃ mafe. 2Ɣaa ɔsu idɔdɔ gu Ɔpo Rɛtɛa ɔbara Ɣaa itupie kubarara ɔtã ma lɛ Mose masiaidze awe. 3Ma ɔɖuɖu ɔɖe Siwarã ame araɖea awɛ̃ saã. 4Fiɛ manɛ Siwarã ame ndu miwɛ̃ saã mɛmɔ. Manɛ ndu mɛ lobɔrɛ i Siwarã ame ita nɛ losiai ma ame. Ita nɛmɔ nɖe Kristo mɔmɔ ne. 5Ɔwi gɔmɔ ame kɔra ne, so iiɣɔ Ɣaa i ma mawɛ̃ iso ala ma nsɛgbai ɔso. Ne ɔso ne, makpi i fafuĩ ame.

6Nwagbe ɔɖuɖu ɖe ara isuã si ite bo sɔ ara wa nsɛ abɔ ikpi si adaakpɛ̃ bo ɔkã lɛ ma awe, 7ɣee bosu so botã aɣɔsɔrɛra lɛ ma awe. Ɔko Sekelea ɔɣɛ sɔ, “Maturi ɔba maasakanya sɔ mato mapia so isoɣɔ, ɣɛɛ ma isoɣɔ ɔba iakpese itarɛ̃ gu asɔrɔ̃ iɖe katɔ.” 8Iikote sɔ boaɖe asɔrɔ̃ kumɛgɔ mabara fiɛ i iyi iwɛ̃ saã iso ne, maturi kukpi sinyɔ itɛ ɔkpi. 9Midaatã bola Bosate bonyɔ lɛ kumɛgɔ mabara fiɛ maɣɛ ɔɖoɖo ma makpi. 10Fiɛ midaatã bota boya Ɣaa iso lɛ kumɛgɔ i ma mawɛ̃ ɔbara fiɛ Ɣaa Kpabo gɔ nto kukpi ɔle ɔwɔra ma.

11Ara wagbe ɔɖuɖu ɔba ma iso si iaɖe ara isuã itã maturi. Matsɛrɛ wã masɛ ana sɔ si boasu boka so alasɔ kayiiso kawirikɔ̃ ɔwi ame bopia kiniɔ. 12Ɔbiara gɔ nsɛ ɔbu sɔ ɔɣɛ teteree ne, ɔnyɔ kukaakɔ sɔ ɔ̃ibabɔrɛ ɔrɔ̃. 13Ilainyɔ igbã biara nɛ loɔba mi iso ne, nɛ ame kere nsɛ iba i ɔturi biara iso ne. Ɣɛɛ Ɣaa sɛ ɔbara i ɔ̃ itɔ̃me iso sɔ ɔ̃ibatã ilainyɔ ɔwe ɔle iɖo fɔ kafɔkaɖe. Fiɛ ana ne, Ɣaa to ɔ̃atã-ɔ ɔle sɔ aawo ɔya teteree fiɛ ɔ̃ate-ɔ ɔri gɔ iso aaki fiɛ aabɔrɛ i ne ame.

14Ne ɔso ne, wũ manyii, miɖi so mibɔrɛgu i iɣɔsɔrɛ ame. 15Nto loka mi lɛ manɔgbadze awe, ne ɔso mi mɔmɔ mikere ara wa nto loɣere mi minyɔ. 16Ikɔi nɛ bosɛ bosɛ ala ɔpɔrɔ̃ katɔ̃ fiɛ bosɛ bopɛ Ɣaa siba i ne iti ne, si bonɛ ara i ne ame ne, iɣɛ itã Bosate ima. Fiɛ boɖoboɖo gɔ bosɛ boɖe i ɔpɔrɔ̃ katɔ̃ ana ne, ɔɣɛ ɔtã Bosate sosina. 17Atoa sɔ bosi gbodzoo ne, gɔ boɖoboɖo ikuri iwɛ̃ i bo ɔɖuɖu sɛ boɖe ɔso ne sosina siwɛ̃ ka boɖe.

18Mibu Israel mabi minyɔ. Mma nsɛ maɖe ara wa masu masɔrɛ Ɣaa ne, maɔbara mawɛ̃ ku Ɣaa i ma isɔrɛ ame. 19Be ɔso nto loɣɛ ngbɔ? Ɔɣɛ loto sɔ aɣɔ wa mapɔ ɣee ara wa masu masɔrɛ wã ne, ira iwɛ̃ iɖe? 20Ooɣo! Nnɛ loto loɣere mi nɖe sɔ, ara wa masɛ masu masɔrɛ aɣɔ ne, siwarã lalaa siɖe masu wã matã, iiɖe Ɣaa. Fiɛ loito lobie sɔ miɖe kulaa ku siwarã lalaa kusiwɛ̃. 21Iilɛ sɔ mianɛ mibɔrɛgu i Bosate ikɔi ame miledza inɛ ibɔrɛgu i siwarã lalaa ana ikɔi ame. Iikote sɔ miaɖe ara i Bosate ɔpɔrɔ̃ katɔ̃ i isɔrɛyo misɛ mialedza araɖea iɖe i siwarã lalaa kasɔrɛkɔ̃ ana. 22Ɛɛbɛrɛ ɔbie boto sɔ Bosate si ɔna sikpã ɔkpɛ̃ sirerɛ? Bofɔ boɖe sɔ boba ɔle boɖo wũ?

23Bosɛ boɣɛ sɔ, “Ɔri pia sɔ boabara ira biara.” Gbaã iɖe. Ɣɛɛ iiɖe ira biara nlɛ. Ɔri pia sɔ boabara ira biara, ɣɛɛ iiɖe ira biara nɖe kusia itã bo. 24Fɔɖedze kuwɛ̃ si ɔdaabie ɔ̃ ɔnɔwɛ̃ saã ɔkpɛ, ɣɛɛ ɔbie nnɛ loakote ɔ̃ malaa.

25Aba ɔri aaɣa sina igbã biara dzɛ mato marɔdɛ̃ aɖe. Ɣɛɛ iikote sɔ ala ɔkarɛ sɔ sina sekelea siɖe ɛɛbɛrɛ kuɣɔ masu masɔrɛ. 26Alasɔ Ɔko Sekelea ɔɣɛ sɔ, “Kayi gu kã ara ɔɖuɖu wa mpia i kã ame ne, Bosate mba.”

27Si ngɔ loiɖe fɔɖedze ɔkpere-ɔ sɔ ba ɖegu wũ ara fiɛ atɔrã sɔ aasɛ ne, ibiara nɛ ɔtã-ɔ sɔ ɖe ne, ɖe ɣɛɛ daakarɛ anɔ sɔ isekele ɛɛbɛrɛ iisekele. 28Ɣɛɛ si ɔrere ɔɣere-ɔ sɔ kuɣɔ masu aɖera wamɔ masɔrɛ ala ne, daaɖe. Si iiɖe ngbɔ ne, kaɣere to kaaɖaa ngɔmɔ. 29Iiɖe fɔ gɔ fɔ loɖe ara wamɔ i kaɣere aɖaa. Ɣɛɛ ngɔ lonya-ɔ fiɛ ɔɣere-ɔ i kaɣere aɖaa. Ɔrere aawo ɔkarɛ sɔ, “Si loba ɔri loabara irere ne, be ɔso fiɛ ɔturi mama kaɣere ɔso ne, loanyua ɔbara? 30Si lopɛ Ɣaa siba i araɖea wa ɔtã me iti ne, be ɔso fiɛ ɔmama aabu sɔ loɣɛrɛ wũ i wã iti gɔ loɔpɛ Ɣaa siba?”

31Ɣɛɛ i bo ɔɖe gu ɔnɛ ame ne, ikote sɔ boabara wã ɔɖuɖu botã Ɣaa iyere kato ikɔlɛ. 32Midaabara kuira nɛ loatɛ̃ ma Yudase ɣee mma loiɖe ma Yudase ɣee mafɔɖedze Ɣaa kɔrɛ ɔri. 33Mibara lɛ kumɛgɔ nsɛ lobara wũ ira biara fiɛ loisɛ lota loya kuwɛ̃ iso. Loisɛ lobie wũ ɔnɔwɛ̃ saã ɔkpɛ, ɣɛɛ nnɛ loabara fiɛ iaɖe isɛɛ itã ɔbiara iɖi.

Ndamu Ɣɛtɛ Siwu

© Wycliffe Bible Translators 2008

More Info | Version Index