Formulario de búsqueda

Esegiël 27

’n Klaaglied oor die stad Tirus

1Ek het gehoor die Here sê vir my: 2“En jy, mens, jy moet ’n *klaaglied sing oor die stad Tirus. 3Tirus is by die see en daardie mense koop en verkoop goed aan die volke van baie lande by die see. Jy moet vir Tirus sê:

“Die Here, Hy wat Here is, sê:

Tirus, jy het altyd gesê jy is

’n mooi stad,

so mooi soos die mooiste stad.

4Jy regeer tot ver op die diep see,

en die mense wat jou gebou het,

het jou soos ’n mooi skip gemaak,

so mooi soos die mooiste skip.

5Hulle het jou twee kante gemaak

van sipreshout van die land Senir,

hulle het ’n sederboom

op die Libanon-berg gaan haal

om vir jou ’n *maspaal te maak,

6hulle het jou *roeispane gemaak van eikehout van Basan,

hulle het jou *dek gemaak

van sipreshout van die Kittiër-eilande,

en hulle het stukkies *ivoor ingesit

in die dek.

7Jou seile was van bont linne van Egipte.

Die seile het vir ander skepe

gewys wie jy is.

Jy het jou toegemaak met pers

en rooi wol-materiaal

van die Elisa-eilande.

8Mense van die stede Sidon en Arwad

het jou geroei.

Jy self, Tirus, het mense gehad

wat die see geken het,

hulle was jou matrose.

9Leiers van die stad Gebal was die mense

wat die plekke moes toemaak

waar water ingekom het,

hulle kon dit goed doen.

Al die skepe, en die mense op hulle,

het na jou toe gekom

om goed by jou te koop

en om goed aan jou te verkoop.

10Mense van die lande Paras, Lud

en Put was jou soldate.

Hulle het hulle *skilde

en hulle *helms in jou opgehang.

Almal kon toe sien hoe belangrik jy is.

11Jou soldate was op die mure rondom jou,

by hulle was daar ook manne

van die stad Arwad,

en op jou *torings was daar manne

van die stad Gammad.

Hulle het hulle klein ronde skilde

opgehang teen jou mure.

Dit het jou mooi gemaak,

so mooi soos die mooiste stad.

12Mense van die land Tarsis

het vir jou goed gekoop en verkoop.

Jy het baie goed gehad,

hulle het dit geruil vir silwer, yster,

*tin en *lood.

13Mense van die lande Griekeland,

Tubal en Mesek

was jou *handelaars.

Hulle het *slawe en *bronsgoed

geruil vir jou goed.

14Die handelaars van die stad Bet-Togarma

het perde en *muile geruil vir jou goed.

15Mense van die stad Dedan

was jou handelaars.

Mense van baie lande langs die see

het vir jou goed gekoop en verkoop.

Hulle het vir jou ivoor en ebbehout

gegee om te betaal vir die goed.

16Jy het baie goed gemaak,

en mense van die land Aram

het daardie goed vir jou verkoop.

Hulle het *turkoois, pers wol-materiaal,

bont materiaal, linne,

*koraal en *robyne

geruil vir jou goed.

17Mense van die lande Juda en Israel

was ook jou handelaars.

Hulle het koring van die land Minnit,

vye, heuning, olyf-olie en *balsemgom

vir jou gegee vir jou goed.

18Jy het baie goed gemaak,

en mense van die stad Damaskus

het daardie goed vir jou verkoop.

Hulle het wyn van die stad Gelbon

en wol van die stad Sagar gekry vir jou goed.

19Mense van die stad Dan

en van Griekeland het goed

van die stad Usal gegee vir jou goed.

Dit was ystergoed, *kaneel en *kalmoes.

20Mense van die stad Dedan

was jou handelaars vir *saalkleedjies.

21Mense van die land Arabië

en die konings van die land Kedar,

het lammers, skaap-ramme

en bok-ramme vir jou gegee

vir jou goed.

22Handelaars van die lande Skeba

en Rama was jou handelaars.

Hulle het van die beste balsem

en *kosbare klip

en goud vir jou gegee vir jou goed.

23Mense van die stede Haran,

Kanne en Eden,

handelaars van die lande Skeba,

Assirië en Kilmad

was ook jou handelaars.

24Hulle het baie mooi klere,

skouerdoeke van blou en bont materiaal,

bont matte en sterk, gedraaide tou

vir jou gegee vir jou goed.

25Skepe van Tarsis het geseil

om vir jou goed te koop en te verkoop.

Jy was ’n skip vol swaar goed

in die middel van die see.

26Jou manne wat jou geroei het,

het jou ver in die diep see gebring,

en daar het die sterk *oostewind

jou stukkend gebreek

in die middel van die see.

27Toe jy daardie dag sink,

het alles saam met jou gesink

in die middel van die see:

alles wat jy gehad het

en wat jy geruil het, jou matrose,

die manne wat die plekke moes toemaak

waar water ingekom het,

jou handelaars, al jou soldate,

al jou mense wat op jou was.

28Die land het gebewe

toe jou matrose begin skree

en vra dat iemand hulle moet help.

29Al die manne wat roei,

het afgeklim van hulle skepe,

en die matrose het op die land

gaan staan.

30Hulle het hard begin skree oor jou,

hulle het gehuil en gevra

dat iemand hulle moet help,

hulle het *stof op hulle koppe gegooi

en hulle het *op die ashoop rondgerol.

31Hulle het hulle *koppe kaal geskeer

oor jou en hulle het *rouklere aangetrek,

hulle was hartseer en hulle het gehuil oor jou.

Hulle was baie hartseer.

32Hulle het gehuil en het begin

om ’n klaaglied te sing oor jou.

Hulle het gesê:

Wie is soos Tirus wat stil geword het

in die middel van die see?

33Die handelaars het die goed

wat jy geruil het,

oor die see gebring,

en toe het baie volke genoeg gehad

om van te lewe, meer as genoeg.

Jy het die konings van die aarde

ryk gemaak met jou baie goed

wat jy geruil het.

34Maar nou lê jy stukkend

in die diep water,

jou goed en al jou mense in jou

het saam gesink.

35Almal wat woon in die lande

langs die see

het baie bang geword

oor wat met jou gebeur het.

Hulle konings het geskrik

en hulle bewe,

hulle gesigte trek skeef.

36Die handelaars van die volke

*fluit oor jou,

hulle skrik oor wat met jou gebeur het.

Jy sal nooit weer ’n stad wees nie.”

Bybel vir almal

© 2007 Bybelgenootskap van Suid-Afrika. Gebruik met toestemming. Alle regte voorbehou.

More Info | Version Index